جوزي طـ,ـلقني وطلعني

جوزي طلـ,ـقني وطـ,ـردني من بيتي، وقبل ما يقفل الباب في وشي… رمى رزمة فلوس وقال بكل برود:
“ده مؤخرِك، اطلعي بره.”
وقفت أبص للفلوس، وأنا مش مستوعبة إن دي نهاية عشرين سنة جواز، وعِشرة، وتضحية.
الصدمة الأكبر ما كانتش الطلاق… الصدمة كانت لما اكتشفت إن الراجل اللي بنيت معاه عمر كامل، واتجوزته وهو ماكانش حيلته حاجة… كان متجوز عليا في السر.
أنا اسمي نادية، واتجوزت حسام وأنا عندي 22 سنة. كنت بنت من أسرة غنية جدًا، وأبويا، الحاج فؤاد، كان صاحب مجموعة شركات كبيرة.

كنت الوحيدة اللي هترث اسمه وثروته، لكن عمري ما بصيت للفلوس قد ما بصيت لقلبي.
حبيت حسام وهو لسه شاب متخرج جديد من كلية التجارة، بيلف على الشركات ومعاه ملف التقديم، يحلم بوظيفة يبدأ بيها حياته. كان مهذب، وطموح، وكلامه يدخل القلب.
لما فاتحت أهلي برغبتي في الجواز منه، اعترضوا بشدة.
أمي قالت: “يا بنتي ده لسه بيبدأ حياته، إنتِ متعودة على مستوى معين.”
لكنني كنت متمسكة بيه.
حتى أبويا، رغم رفضه في البداية، وافق في النهاية لما شاف إصراري، وقال لحسام يوم كتب الكتاب:

“أنا وافقت عشان بنتي بتحبك، لكن أوعى في يوم تكسر قلبها.”
ووعده حسام قدام الكل.
بعد الجواز، شغله أبويا في شركته. بدأ موظفًا عاديًا، وكل ترقية أخدها كانت بعد تعب، لكن الحقيقة اللي محدش يقدر ينكرها إن أول باب اتفتح له في الحياة كان بفضل أبويا.
ولما كتبنا الكتاب، المأذون سأل عن المؤخر.
أبويا قال: “اكتب عشرة آلاف جنيه.”
وقتها، من عشرين سنة، كان مبلغ كبير جدًا، لكنني ابتسمت وقلت:
“حتى لو المؤخر جنيه واحد، أنا متأكدة إن اليوم ده عمره ما هييجي.”
ضحك الجميع، وضحك حسام هو كمان، ومسكني من إيدي وقال:

“اليوم ده مستحيل ييجي يا نادية.”
يا ليتني ما صدقته…
مرت عشرون سنة كاملة.
كبرت الشركة، وكبر اسم حسام معاها.
بعد وفـ,ـاة أبويا، بقى هو المدير التنفيذي، والكل بقى يحترمه ويعمله ألف حساب. أما أنا، فاكتفيت ببيتي وأولادي، كريم وملك، وكنت فخورة بنجاحه، وأقول لكل الناس:
“ربنا كرمه لأنه يستاهل.”
من سنتين، دخلت الشركة موظفة جديدة اسمها ريم.
كانت مطلقة، في أوائل التلاتينيات، واتعينت سكرتيرة خاصة لحسام.
في البداية، كنت أشوفها في المناسبات، تلقي السلام بابتسامة واسعة، وتناديني:

“مدام نادية، حضرتك قمر.”
ماكنتش أعرف إن الابتسامة دي كانت أول خطوة في خطة رسمتها من أول يوم دخلت فيه الشركة.
كانت تعرف إمتى تمدح حسام، وإمتى تشتكي، وإمتى تطلب مساعدته، لحد ما بقى وجودها في يومه أهم من أي حد.
وأنا… كنت واثقة في جوزي ثقة عمياء.
لدرجة إن آخر حاجة كانت ممكن تخطر على بالي… إنه يتجوزها في السر.
لكن الحقيقة ظهرت في يوم ماكنتش مستعدة له أبدًا.
#حكايات‌_ندى‌‌‌‌‌_الجمل
اليوم ده بدأ عادي جدًا…
صحيت بدري، حضرت الفطار، وصحيت ملك عشان تلحق المدرسة، أما كريم فكان نازل الجامعة.

حسام لبس بدلته، خد مفاتيح عربيته، وقبل ما يخرج قال وهو بيبص في ساعته:
“عندي اجتماع مهم النهارده، ممكن أتأخر.”
ابتسمت وقلت: “ربنا يوفقك.”
خرج من البيت، وأنا فضلت أبص عليه من البلكونة زي ما بعمل كل يوم.
ماكنتش أعرف إن الراجل اللي بودعه كل صباح، بقى عايش حياة تانية بعيد عني.
بعد الضهر افتكرت إن حسام كان طالب مني أدور على ملف قديم فيه عقود خاصة بالشركة. قال إنه ممكن يحتاجه في اجتماع مجلس الإدارة.
دخلت مكتبه، وفتحت الأدراج واحد ورا التاني.
وأنا بطلع الملفات، وقع قدامي ظرف بني صغير.

افتكرته عقد من العقود، ففتحته من غير أي تردد.
لكن أول ما عيني وقعت على الورقة اللي جواه… حسيت إن أنفاسي اتسحبت.
قسيمة زواج.
باسم…
حسام عبد الحميد.
وقفت مكاني مش قادرة أتحرك.
قلت لنفسي: “أكيد دي قسيمة قديمة، يمكن تخص حد تاني.”
لكن لما بصيت على اسم الزوجة…
ريم أحمد.
ريم…
سكرتيرته.
إيدي بدأت ترتعش.
بصيت على تاريخ عقد الزواج…
من سنة ونص.
يعني طول السنة والنص اللي فاتوا، وهو كان كل يوم يخرج من بيته وهو جوزي، ويروح يعيش دور الزوج مع واحدة تانية.

وقعت على الكرسي وأنا حاسة إن الدنيا بتلف بيا.
افتكرت كل مرة كان يقول فيها: “عندي سفرية شغل.”
“عندي اجتماع متأخر.”
“راجع متأخر النهارده.”
كل الأعذار اللي كنت بصدقها… طلعت أكاذيب.
فضلت أبكي ساعات، لكن فجأة دموعي وقفت.
قفلت القسيمة، وقعدت فى الصاله.
ومسحت وشي.
وقلت لنفسي:
“لا، مش هنهار قبل ما أسمع منه.”
الساعة كانت قرب عشرة بالليل لما سمعت صوت عربيته.
دخل البيت وهو بيتكلم في التليفون ويضحك.
أول ما شافني، قال بابتسامة:

“لسه صاحية؟”
من غير ولا كلمة…
حطيت قسيمة الجواز قدامه على الترابيزة.
ابتسامته اختفت.
بص للقسيمة…
وبعدين رفع عينه وبصلي.
استنيت منه يقول: “دي كدبة.”
أو: “اسمعيني.”
أو حتى: “أنا غلطت.”
لكنه قال بمنتهى البرود:
“كنتي لازم تعرفي في يوم.”
الكلمة نزلت عليا كأنها سكينة.
قلت وأنا بصعوبة بطلع صوتي:
“يعني… بجد اتجوزت عليا؟”
رد وهو قاعد بكل هدوء:
“أيوه، اتجوزت.”
“ليه؟”
هز كتفه وقال:
“دي حياتي، والشرع محلل أربعة.”
كنت ببصله وكأني أول مرة أشوفه.

فين حسام اللي وعد أبويا يحافظ عليا؟
فين الراجل اللي كان بيقول إنه مستحيل يزعلني؟
اختفى… وكأن اللي قدامي شخص غريب.
قلت بدموع:
“بعد عشرين سنة… ده جزائي؟”
قام من مكانه من غير ما يتأثر بكلمة واحدة.
دخل أوضة النوم.
وبعد دقيقة رجع وهو ماسك رزمة فلوس.
رماها في وشي.
الفلوس وقعت على الأرض.
وقال بكل قسـ,ـوة:
“خدي، ده مؤخرِك.”
بصيت على الفلوس، ولسه مش مستوعبة.
كمل وهو بيبصلي باحتقار:

“عشرة آلاف جنيه، المؤخر اللي أبوكي كتبه زمان.”
حكايات ندى الجمل
ثم أشار ناحية باب الشقة وقال:
“لمي هدومك واطلعي بره، البيت ده خلاص مبقاش ليكي.،، يتبع
باقي الرواية داخل اللينك بالتعليقات
ولاتنسى ذكر الله